سكان قصور وفيلات.. وسكان قبور وعشوائيات.. فرق كبير بين الاتنين.. والعدالة الاجتماعية فين؟... تلوث بيئي وسحابة غبار.. وفاكهة ماسخة بطعم خيار.. دراما كئيبة وأساليب عنيفة.. أغاني رخيصة وفتاوي سخيفة... ضحايا كتيرة بالألوفات في سيارات وعبارات وقطارات.. وحوادث غريبة في بلاعات.. «وعلاج ده كله.. بمسكنات»!!

بعد زواج السلطة بالمال.. الناس بقيت في أسوأ حال.. الخصخصة والاحتكار خلت الأسعار تولع نار... بيع وتسقيع أراضي.. والشعب كله مش راضي.... هربت فلوسنا وطلعت برة.. ويقولوا عليها تجارة حرة.... ومن غير دراسة ولا تفكير.. تفرض جباية علي الفقير.. وبعد ما الخشي مات.. اتذل الغلابة والمعاشات!!.. عقول شاردة بكليبات.. وشباب ضايع بمخدرات... من يأسه فكر في أسفار..

 ونهايته كانت في عمق بحار.. إنتاج هزيل وعمل مافيش والبني آدم إزاي يعيش؟ .... حتي يلاقي رغيف العيش... وإذا لاقاه يروح ما يجيش!!... حكومة ذكية مستعجلة.. علشان تحل المشكلة ... خد باليمين وهات بالشمال.. وعيش بقي علي قد الحال... الناس تخرج في مظاهرات... وأصوات تصرخ بالهتافات.. وحكومة ودن من طين والتانية عجين... ويشتكوا لمين غير رب العالمين...

واللي بيحب مصر بجد عمره ما ح يبان في الصورة.... صور يا زمان!!